Posted by: mykopop | Saterdag 13 Maart 2010

Bitterboela en soetgousblom – Pieter Strauss

Iemand het vir my gesê hierdie is nou nie ‘n wafferse boek van Boesmanlandse stories nie.  Van die eerste verhale in die boek, bv. Rooibok teen die rante, waarin die tante ‘n snoekertafel in haar slaapkamer laat installeer en Uit Den Hoenerhoofde waar die dominee ‘n tante se hoenderhaan uit die dorp verban.  Dit kan mens die indruk gee dat dit net oor platvloerse humor gaan.

Daar is egter verhale met baie meer meriete.  In die verhaal Anderkant die soetdoring kry mens weer die gevoel hier kom weer iets onsmaakliks as die skrywer die woord “aanskou-my-goutjie” gebruik.  Maar dis net ‘n stukkie boereverneukery!  Dis ‘n unieke woord wat Strauss hier opgeteken het, ek wil nie die betekenis hier weggee nie, lees self die storie, die spesifieke storie kry baie diepte na die einde toe.

Met die lees van Die slang met die dassiekop, wat uit drie kort verhaaltjies bestaan, vertellings van bruinmense oor die  slang wat glo kinders vang, het ek gedink nou is die boekie besig om ernstig spoed te verloor, maar net die volgende een, Dassie-adder speel tweede viool, alhoewel ook met ‘n skeutjie stouterige humor, is een van die briljantste verhaaltjies wat ek onlangs gelees het!

Met die verhale Koos Num word ‘n ster, ‘n Pa soek sy seun en Ontmoeting met //Kabbo vind die skrywer aansluiting by Antjie Krog se Met woorde soos met kerse, oor die digters //Kabbo en Dia!kwain.  Die laaste een van die drie is ‘n moderne verhaal oor die maak van ‘n TV-advertensie met gaffers, ‘n  focus puller op ‘n kameratrollie, ‘n filmspan wat daggazolle rook ens.  Dit bring mens tot die besef dat die skrywer nie in dieselfde tyd skryf as mense soos E. de Roubaix, A.A.J. van Niekerk en Jan Spies nie, maar dat daar heelwat navorsing vir die boek gedoen is, en Stauss met waardigheid sy plek langs bg. name op ‘n boekrak kan volstaan.  Ek sal sy ander boeke ook lees as ek die kans kry.

Benewens die stories is daar interessante inligting in die boek. Voor en agterin is daar kaarte van Boesmanland.  Die boek sluit af met ‘n Karmenaadjie – sowat 10 bladsye woordverklarings en gesegdes.

Vir iemand wat nie die hele boek wil lees nie, beveel ek die volgende verhale aan:

Mondroertjie
Die brief
Anderkant die soetdoring
Die Amalekiete se medisynevrou
Oupa Goedeman en die reisiger na êrens
Oom Vloekflip en die Heitsi-Eibib
Dassie-adder speel tweede viool
Ontmoeting met //Kabbo
Die pad om Verneukpan.


Responses

  1. Dankie vir jou mooi bespreking.
    Vriendelike groete.
    Pieter Strauss


Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Change )

Twitter picture

Jy lewer kommentaar met jou rekening by Twitter. Log Out / Change )

Facebook photo

Jy lewer kommentaar met jou rekening by Facebook. Log Out / Change )

Google+ photo

Jy lewer kommentaar met jou rekening by Google+. Log Out / Change )

Connecting to %s

Kategorieë

%d bloggers like this: