Vanaand is ons nou almal hier
elke een van ons vier
daar was vir ons geen laaste skuiwergat
ons, lankal siek en sat
nou skaakmat

twaalf jaar is so iewers tussen
een vyfde of een sesde
van ons gegewe sewentig tagtig jaar
eintlik is dit ‘n winskoop
selfs vier maal ‘n vyfde is maar tagtig persent
steeds veel minder nog as een volle lewe

maar twaalf jaar
sonder sterre
sonder maan
sonder son

‘n volle twaalf jaar
sonder liefde
sonder lewe
sonder lag

nou die metamorfose
nou die twaalf jaar van wag
soos ‘n papie in sy kokon
nou die eindelose tyd van wag
soos ‘n drenkeling
op sy sluwe eiland van eensaamheid
dan weer, die stap in die straat af
nog steeds alleen

nou bly een vraag vir my finaal
sal ek soos Herman Charles
iets blywends hieruit haal?

12 Augustus 2008 Beeld Berig

© 2008 Chris van der Westhuizen

Erkenning vir die titel aan Herman Charles Bosman (Cold Stone Jug)

Lees ook Saterdagaand Tuis, die stukkie onder die opskrif ‘n Verlore geleentheid.